22 milionë euro për kilometër! E vërteta e PPP-ve që solli përplasjen e ekspertëve
E Mërkurë 26 Nëntor 2025, 16:04
Dritare.net
Një nga temat më të nxehta që ka dominuar diskursin publik në Shqipëri është kostoja e rrugëve të ndërtuara me Partneritet Publik-Privat (PPP). Në debatin mes inxhinierit Arben Meçe dhe ekonomistit Olti Rrumbullaku në emisionin Shqip nga Dritan Hila në DritareTV, kjo çështje arriti kulmin kur u diskutua për segmentin Milot-Balldren dhe Thumanë-Kashar, ku akuzat për kosto abuzive prej 22 milionë eurosh për kilometër u përballën me argumentet teknike të strukturës së koncesioneve.
Inxhinieri Meçe mbrojti me forcë tezën se krahasimi i kostos së një rruge të ndërtuar me buxhet shteti me atë të një koncesioni është gabim themelor ekonomik dhe logjik. Ai shpjegoi se në një koncesion, privati merr përsipër jo vetëm ndërtimin, por edhe financimin (kredinë), riskun e trafikut, mirëmbajtjen dhe operimin për një periudhë të gjatë. Sipas tij, shifra 22 milionë euro nuk është kosto ndërtimi, por kosto totale e shërbimit gjatë gjithë jetëgjatësisë së kontratës. Meçe sfidoi kritikët të gjejnë një koncesion në Evropë me tarifë kalimi më të ulët se 11-12 cent për kilometër, duke argumentuar se tarifat në Shqipëri janë të justifikuara nga tregu.
Nga ana tjetër, Rrumbullaku e quajti këtë logjikë "absurditet ekonomik" që rëndon mbi qytetarët. Ai argumentoi se vendosja e tarifave të larta dhe kostove të fryra në segmentet më të lehta fushore (si Thumanë-Kashar) ka bllokuar efektivisht zhvillimin e pjesës tjetër të Korridorit Blu. Sipas ekonomistit, nëse e njëjta metodologji do të ndiqej për segmentet e tjera si Kashar-Lekaj apo Lekaj-Fier, kostoja totale për qytetarët do të bëhej e papërballueshme (duke arritur në 20 euro për një udhëtim), gjë që do të detyronte trafikun të devijonte në rrugë dytësore, duke dështuar kështu qëllimin e autostradës. Ai ngriti dyshime se këto kosto nuk reflektojnë riskun real, por mungesën e konkurrencës dhe favorizimin e kompanive të caktuara pranë qeverisë./K.C/dritare.net
